الله يا ذيك الحكايا والصور ( صور شعريه قديمة لحياة طفولتي)

[الشاعرحمد عبدالله العقيل]

رأيت صوراً فوتوغرافية قديمة جدا لي ، وكان عمري فيها قريب الخمس سنوات ، فحركتني تلك الصور الفوتوغرافية ، فكتبت بالمقابل صوراً شعرية ، باللغة المحكية ، أتذكر الفترة الزمنية من 1386 إلى 1389هـ ، أرجو أن تنال إعجابكم
وأنا بدوري أهديها لكم
1. الله يا ذيك الحكايا والصور
أجمل صور ، فيها حكايات و عبر
شفت القديم
وحالة تحكي عن زمان معتبر
شاهدتها وعيني دمعت وانا اعتبر
مثل الحلوم اللي نشوفه له عبير
2. الله يا ذيك الحكايا والصور
كنا جميع
وكنا نفرح بالقليل
وانا بذيك الحال شكلي مختلف
قبل الزواج قبل العيال ، قبل المدارك تختلف
3. الله يا ذيك الحكايا والصور
قبل التعلم والجسم توه صغير
وأفكاري أفكار الطيور
وذيك الفنايل نلبسه شكله حقير
وحافي وانا والله سعيد
لأني ما افكر كثير
4. الله يا ذيك الحكايا والصور
كانت همومي مثل جسمي بالصغر
وكانت ملاهينا مراجيح ، إن لقيناها تسر
وكان الحلاو ، وعلك ابو طبعه والقريض
واذا عطونا نشتري نركض نبي نشري بقرش
والقرش كانت قيمته أقوى من ريال هالزمن
تشري به وتفرح كثير
5. الله يا ذيك الحكايا والصور
وغيرك يمكن ما يلاقي له ولو شي يسير
وذاك الزمان كنا نروح لمسجد بجانب بيتنا
وامسك إيد العم صالح للصلاة
ما فيه مصالح ، كنا بسعاده دايمه
ودوم نفرح بالقليل
لأن ما مثلك يسير
6. الله يا ذيك الحكايا والصور
ناكل ننام ، نصحى
وبعدين نتهاوش مع بعض وسط النهار
ونلعب بقية يومنا
حتى المسا
ويازينها أيام ويازين هاذاك العبير
7.الله يا ذيك الحكايا والصور
كلش رخيص
وكلما لقينا شي يفرح
ننسى أية مشكله
ثم من جديد نلعب ونركض بالجديد ...
وين الجديد ، يا قل والله ملبسه
حيثه عزيز ، ولا نشوف منه كثير
8. الله يا ذيك الحكايا والصور
نلعب مصاقيل وكعابه أوعكوس
واحيانأ أول حيد ، وطاش وحبيش ،
وغميما ، طيرو يا عصافير مكه
وحنا نحوس تحت الشموس
وما ننام إلا العشا
ويازينها نومه على مدة حصير
9.الله يا ذيك الحكايا والصور
وكل يوم ناكل غدانا بشمسة البيت الكبيره
بالظهيره
وبالليل نتعشى ونجمع هالقموره
نخرم ونسوي كفر
مربوط في مغاط أسود لاقطينه
ونلفها على مكار صغار
ونشبكها بتنك جالون زيت نركبه
ونسحبه بحبل خيش سلوتلي
ولا نتعدى حوشنا من قدنا
لأنه ما نفكر كثير
10الله يا ذيك الحكايا والصور
ودنانتي من جنط سيكلنا ... المحلي القديم
وقوطي جبن كرافت افك قصاصته
ثم اعفطه وبعود وادف به الكفر
وانا ما مثلي اسوقه بالعصا سوق الحمير
11. الله يا ذيك الحكايا والصور
أوأقتطع ذاك العسيب
واشيل منه السعف وانا كالبطل
وامسك عصا واركب وكني فوق خيل جامحه
واطير فوقه كني فارس أو أمير
خيال ما مثلي على أرضي أسير
12. الله يا ذيك الحكايا والصور
واحيان نلعب بالدبق
والفوز عندي ما يشق
دايم أفوز
واجمع الدبق الصغار لحال
واعزل الكبير
نغلب ولا نغلب
والى لعبنا مع بنات
نهاش .. ثم يقال قم خلك بعيد
ويعيرونا بأيش .... بقولتهم ...
الولد مع البنات
بطته شوكه ومات ...
ثم نستحي ونروح بعيد
13. الله يا ذيك الحكايا والصور
وعند الدبش
نحشي ونعطي هالدبش من هالعلف أو هالنفيع
وتهوشنا أمي وتقول
شبعانة ذيك الدبش خوفي تموت ثم وش نصير
14. الله يا ذيك الحكايا والصور
واذكر ابوي لا اذن توضا وراح بكر للصلاة
وانا مع امي بمكتبه
واركض ابي اركب على كرسيه الجلد الخضر والعب وأدور
واختي تجي وتدفني ورجليني مدلاة وراسي بعد ما اوقف يدور
15. الله يا ذيك الحكايا والصور
واذكر إذا نزل المطر ثم انتشر هاك الجراد
انا واخيي نصيد منه
ونولع ضو صغيره من خشب أو من كراتين خراب
ثم نشوي المكن الكبيره
ناكله تالي عصير
يا هي لذيذه هالحياة
وحنا نعيش بها على شي يسير
16.الله يا ذيك الحكايا والصور
واذكر نروح لمسجد الشيخ نحفظ قرآن من بعد الفجر
واذكر مدرسنا إذا اخطا حدانا بالعصا ذيك الطويله ينفجر
يجلد بلا رحمه ولا يرضى أحد يغلط ولو شي بسيط
قصده يعلمنا كتاب الله نحفظ ثم من بعده نسير
17.الله يا ذيك الحكايا والصور
واذكر يوم ايدي بيد أبوي
يبي يسجلني أولى ابتدائي
بمدرسة جبره بلا أجره
عليه المشلح الأسود يلاطفني
ووده ادرس وأكبر
ويبيني رجال أصير
18.الله يا ذيك الحكايا والصور
واذكر يوم البيت شراه من الأميره
وكان في حوشه قليب ، ماها عذيب
ويوم دخلت هالمواصير للبيوت
قام ودفن ذيك القليب
وانا بتفكيري اقول والله غريب
19.الله يا ذيك الحكايا والصور
واذكر إلى جانا ضيوف
يرسل ابوي من الذبايح تشترى
ويجيب قصاب نشيط
ونقعد نشوف الذبح في حوش القليب
يرجي إذا شفناه نكسب معرفه
وحنا نشوفه في شفق ، ونقول ذا شي عجيب
20. الله يا ذيك الحكايا والصور
واذكر ونيت أبيض موديله تسعه وستين
ودوه للورشه وركب له حنايا وهنقلين
وحنا نتعلق بالحنايا
كنا بتعلقنا بفرح دايم
من قدنا ، والله عجيب
21. الله يا ذيك الحكايا والصور
واذكر إذا وقت العشا أو الغدا قرب نعطى قروش
وملقح الخبز الرمادي نشتري كم من رغيف
لزوم عشوتنا وانا اقطع شارع جدا عريض
وما هو عريض ، لكن عيني بالصغر ، تشوف هالشارع عريض
يوم ان اخذت الخبز أعبر هالطريق
حصل علي شي خطر
و بغى يدعسني شفر
ولكن ربي قد ستر
والتمو اللي حول هاذاك الشفر
سلمت من شي يضر
وقالو سلامات سلامات
وقمت لم بيتي أسير
22. الله يا ذيك الحكايا والصور
واذكر حكايا الجن والعفريت والسعلوة ، والبيت المهجور
واذكر حكايا الذيب واغنام كثيرة ثم اصير
من خوفي متغطي ببطانيتي
وما اقدر أنام
وأصير لفكري أسير
23. الله يا ذيك الحكايا والصور
واذكر إذا رحنا لخالي بالمزارع والنخيل
واذكر إلى طبت بنا سيارة ابوي الشفر
بالمزرعه ، اعيال خالي يفرحون ، ثم يرقصون
وبالفرح هم يهزجون ، يا سعدنا بضيوفنا كل العقيل
24. الله يا ذيك الحكايا والصور
واذكر إذا نمنا بروشننا أنا واختي إذا قمنا الصباح
نصيح باعلى صوتنا لامي
لأن أمي قفلت أبواب روشنها بمزلاجه
تخاف إنه يجينا شي
وهي من فجرها بالبيت ترعى فيه أحواله
وهي تصلح فطور الشيخ وعياله
وتزهب اللازم بعد ما ترتب احواله
يجزيها ربي ألف خير
25. الله يا ذيك الحكايا والصور
وذكرت امي إذا ما اشتد فينا البرد
تلبسني قحفيه
بقماش ملون زاهي
خاطتها بمكينتها
ونلبسها وتربط هالقحافي بالحبال تشد
تبي أضمن عن البرد الشديد الجد
تبينا ننام بخير ولا يجينا ما يكدرنا
يجزيها ربي كل خير
26. الله يا ذيك الحكايا والصور
واذكر إن هاك البيت
وش كبره كبير
و به مصابيح طويله
واذكر معاليق القرب جنب الصهاريج الأخيره
وصفاف أمي حصه الكبرى
وذيك لجدتي مزنه
وذيك لأمنا نوره ، وهذي مكتب الوالد
وكم صفه لاخواني
وروشن أمي الفوقي به غريفه وسط غرفه
وذاك المطبخ الأسود وجنبه للحطب صفه
وحوش للبقر معها عجل يمكن أو عجيله
27.الله يا ذيك الحكايا والصور
وأذكر بسطح طايتنا ،إذا جا القيض
انرشه بسطل الماء
و نفرش فرشنا رصات
العيال مع العيال
والبنات مع البنات
نطالع هالسما ونعد مافيها قبل ما ننام
ونحلم أحسن الأحلام
28. الله يا ذيك الحكايا والصور
واذكر يوم سجلنا انا وخالد بروضتنا
يجي هالباص من بعد الفجر يومي وياخذنا
ونلبس هالمراييل الرماديه وتفرحنا
وكل يوم الأناشيد الجميلة بدوم تسعدنا
ويسقونا حليب وناكل البسكوت يشبعنا
وشفنا شي ما شافه كثير وخير ما شفنا
وأناشيد الصباح ، نحفظه ، وياما رددنا .....
ماما ماما ماماتي ،،، إنتي أمل حياتي
عاشت عاشت الماما ،،، يعيش أبويا واخواتي
لو يعطوني ملايين ،،، ما بدي أنسى الماما
وعلى هالحال وبالجيه بنفس الباص يرجعنا
29.الله يا ذيك الحكايا والصور
واذكر أن امي عطتني ريال واحد أصرفه
وقالت ترى لك قرش من عشرين لازم تحفظه
وسلفحت للدكان ومن السعد فرحان
وانا راجع فقدت القرش ... ضاع القرش ... وين القرش ؟؟؟
وعودت امشي بذاك الشارع المترب
أدور قرشي الضايع ، وانا في هم
ومرات كثيره ، أروح وامسح الشارع طول بعرض
وادور تحت سياره ، غدين القاه
ومع يئسي قررت اعود لأمي بلا قرشي
ثم اكتشفت إن إيدي اليسرى عرقانه
فتحت ايدي وإلى هالقرش في أيدي وغرقانه
احسبه ضاع ، وهو بيدي ...
وربي قد عقل قرشي
30. الله يا ذيك الحكايا والصور
واذكر أروح لبيت هالجيران بسوق السد
واطق الباب ، وتفتح لي زهوه
وتقول وش تبغى ، واقول الإسكريم التوت .. من قدي
وتعطيني اسكريم التوت بباغة ... ثلج وريح التوت يسحرني جد ... من جدي
ولكن اللي قاهرني اشوف البنت بكرتتها ، وفوق الراس طاقيه ولد
وانا استغرب واقول اشلون بنت وتلبس لباس العيال ... وهالقصه تعقدني
31. الله يا ذيك الحكايا والصور
ويوم العيد في الشارع
نسير وكلنا لابس جديد
وكلنا دارع ... على البيبان... نطق نقول
أبي عيدي ... أبي عيدي
ومرينا على الجاسر ، وعطانا من قريض وحب وهو طالع
وفرحنا كثير ...
وحنا نصج بالشارع
بفرحه عارمه يازينها طلعه
32. الله يا ذيك الحكايا والصور
ومره جا ابو داود
ووجه احمر بلونه تقل مطقوق
وهو مطقوق
أثاريه متعدي برا حارتنا
ولقوه عيال وقالو له
قط قمرق دق قمرك، وما لبى
وطقوه كلهم ، وخذو هاللي جمع كله بهاك العيد
وما جمع كله مقرود
يخلف الله يابوداود
33. الله يا ذيك الحكايا والصور
واذكر لين أصبحنا
على فطير تجمعنا
وناكل من يسير الخير هالموجود
أحيانا خبز مع فول يصلح في منازلنا
وحليب من البقر مغلي وفيه زبود
ونشرب هالحليب بركود
لأنه حار وما يبرد واخاف يلطع لساني وما من زود
لكنه به المقصود
34.الله يا ذيك الحكايا والصور
وشهر الخير شهر الصوم
اذكر من فتافيت الأمور حيثي صغير ما أصوم
واذكر إلى جاء العصر ارسل بيتنا سماط مع الصحن الكبير
متروس به من كل خير كثير
يفطر الصوام في مسجد صغير
الله يقبل صومهم ، تفطيرهم
ويجزاه أبونا كل خير
35. الله يا ذيك الحكايا والصور
واذكر إني قمت تالي الليل
بجو بارد شاتي وما بي حيل
أدور امي وقمت اصيح
وجت يمي وخذتني يم جدتنا
وإلى ان ابوي وعماتي بعد امي وخالاتي والاهم ياكلون
يتسحرون ذيك المطازيز اللذيذه
وانا فرحت وزال من نفسي هموم
لكن صغير ما ادري وش القصه ولوهو ليش حتى فيه صوم
وللموضوع بقيه
أرجو أن تنال إعجابكم
حمد بن عبدالله العقيل

[الأمل الموجود]

:556:السلام عليكم:556:

والله شي رائع.....منظومة تجسد ذكريات الطفولة الجميلة الله يعطيك العافية :icon150:

ذكرتني بزمان أول وانا قاعدة أقرا أتخيل نفس المناظر وأتذكرها لأن أغلبها مر علي

والقرش كانت قيمته أقوى من ريال هالزمن
تشري به وتفرح كثير
صدقت.....الفلوس الحين معد تجيب شي .

كنا نفرح بالريال وكننا طايحين على كنز ولي جت العشرة تقول جاينا مال قارون :o

ودنانتي من جنط سيكلنا ... المحلي القديم
وقوطي جبن كرافت افك قصاصته
ثم اعفطه وبعود وادف به الكفر
كنت أشوف اخواني وعيال الجيران يسوونها :sdd:

والى لعبنا مع بنات
نهاش .. ثم يقال قم خلك بعيد
ويعيرونا بأيش .... بقولتهم ...
الولد مع البنات
بطته شوكه ومات ...
ثم نستحي ونروح بعيد
يازين ذيك الأيام وزين حيا العيال وطهارة قلوبهم صحيح شياطين بس لما ينتهاوشون

يعقلون بعكس الحين يخاف الواحد من طفل عمرة 5 سنين ولا فيه احترام ولا تقدير

للكبير :swsw:

واذكر إذا نزل المطر ثم انتشر هاك الجراد
انا واخيي نصيد منه
ونولع ضو صغيره من خشب أو من كراتين خراب
ثم نشوي المكن الكبيره
ذكرتني بالوالدة الله يحفظها قلبها منقطع على المكن وتتمنى يجي وتاكله :eek:

ثم اكتشفت إن إيدي اليسرى عرقانه
فتحت ايدي وإلى هالقرش في أيدي وغرقانه
احسبه ضاع ، وهو بيدي ...
على الطاري.... سمعت من امي شي يشبه هالسالفة بس مضحك وما يدخل المزاج

تقول فيه حرمة تدور ولدها وهو على كتفها ولما طلت في البير طاح الولد :p

واطق الباب ، وتفتح لي زهوه
وتقول وش تبغى ، واقول الإسكريم التوت .. من قدي
ياسلام ما في أحلى من ايسكريم التوت المثلج في الأكياس

مهنتنا بس نشفط ولا ينمل لأن توت أول أصلي :MH47:

.....تقبل خالص الامتنان والتحية.....

:556:دمت بحفظ الله ورعايته:556:

http://m002.maktoob.com/alfrasha/up/10785090372105243409.gif

[د.عبدالعزيزالعثيمين]

توثيق رائع لعادات وتقاليد تلائم بساطة الحياه

والتداخلات الاسرية والالفه بين الجميع

ويتضح البساطه الاجتماعية والاسرية

شكرا استاذنا الكريم

احسنت وابدعت واعطيت هذا المنتدى نكهة جديده

هكذا المبدعون وجودهم دائم يضيف الجديد

[الـمتـميـــــزة]

الله عن جد أبيات رائعة


صحيح ماعشنا بذاك الزمان لكن من كثر ماسمعنا عنه حبيناه

وأنا شخصيا أحسه أفضل من أيامنا هذي بكل شي


وخاصة فيما يتعلق بالأطفال وحياتهم وشقاوتهم


ربي يعطيك ألف عافية

[ghada]

سلمت الأنامل أخوي على ماخطته أناملك
من قصه حياة طفولتك لما فيها من جمال البراءه والبساطة
والأجمل الوصف الدقيق للتفاصيل والبيئة المحيطه بك بلأضافه الى الجيران ووفائك لهم وأنتمائك للزمن الجميل وذلك وقت طفولتك ..

أنا مع أختي المتميزه في كلماتها هذه ....

صحيح ماعشنا بذاك الزمان لكن من كثر ماسمعنا عنه حبيناه

وأنا شخصيا أحسه أفضل من أيامنا هذي بكل شي


وأضيف أيضاً عليها
لما فيها من بساطه ومحبة الناس لبعضها البعض لكن الأن المجتمع أصبح كله مظاهر وتكبر
وذلك لعدم وجود الآمان فيه


شكراً لك ولتلك المحطات من ذكرياتك التي قمت بسردها لنا
اهنيك أخوي أبن الأجاويد
فاأنت كما قال الدكتورعبدالعزيز أبدعت