بركات الشريف ينصح ابنه ( احفظ دبشك )

[الشاعرحمد عبدالله العقيل]

يامـرقـبٍ بالصـبح نطـيت راقـيــك *** مـاواحـدٍ قـبلي خـبرتـه تعـــــلاّك

ولّيت يا ذا الدهر مااكبر بلاويـــك *** الله يزّودنا السلامه مـن اتــــلاك





يا الي على العربان عمّت شكاويك *** ولّيت يا دهر الشـقى وّل مـقـواك

واليوم ها الكانون غادٍ شبابـيـــك *** تلعـب به الأرياح من كـل شـبّـاك





يا مالك أسمع جابتي يوم أوصيك *** وأعرف ترى يابوك بآمرك وانهاك

وصـيـتٍ مـن والـدٍ طـامـعٍ فـيـــك *** تسبق على السّاقـةالسانه لعليـاك





أوصيك بالتقوى عـسى الله يهديك *** لـها وتـدركـها بتوفـيق مـــــولاك

الله بحـق اجـدادك الغـر يعطيـــك *** مـرضاته مـع ماتمـنـيته أمنـــــاك





احفظ دبشك الي عـن الناس مغنيك *** الي اليا بان الخلل فيك يرفــــاك

واعـرف ترى مـكه ولاهـا بناخـيك *** لـو تطلبه خمسة ملاليم ما انطاك





اجعـل دروب المرجله مـن معانيك *** واحذر تميّل عـن درجها بمـرقاك

لاتنسـدح عـنها وتبغـيني أعـطيـك *** جمـيع ما يكفـيك ما حـصــل ذاك





أدِّب ولدك إن كان تبغـيه يشـفيــك *** واستسعـفه من بعـد مرباه بــالاك

إما سمـج واستسمـجك عـند شانيك *** ويـفر مـن فعله صديقك وشـرواك





وإلا بعـد جـهـله ترى هـو ياذيــك *** لـو زعـلت أمـه لا تخـليه يــــالاك

واحذر تضيع كـل منهو ذخـر فـيــك *** معـروفه لا تنساه واوفه بعرفاك





ترى الصنايع بـين الاجواد تشريـك *** اليا طمـعـت بغـرسها لا تعـداك

واحـذر سـرور بغبة البحر يرميـك *** ولا عنده افـلس من تشكيك وبكاك





واوف الرجال حـقوقها قبل تاتيــك *** لا توفـيه بالقول فالحـق يقفــــاك

وهرج النميمه والقفى لا يجي فيك *** واياك عرض الغافـل اياي وايـاك





تبـدي حديـثٍ للمـلا فـيه تشـكيــك *** وتهيم عندالناس بالكذب واشـراك

واليا نويت احـذر تعـلم بطاريــــك *** كم واحدٍ تبغي به العرف واغواك





واحـذر شماتت صاحـبٍ لك مـصافيك *** واليا جـرالك جاريٍ قـال لـولاك

ولا تحـسـبن الله قـطـوعٍ يخـليــــك *** ولا تفرح إن اللةعلىالخلـق بدّاك





الضيف قـدَّم له مـن حـين يلفـيـــك *** مما تطوله يا فـتىالجود يمنـاك

احذر تلقـي الضـيف مقرن عـلابيـك *** خـله مـحـبٍ لك صـديقٍ اذا جاك





واوصيك زلات الصديق ان عـثا فيك *** مازال يغطاهاالشعر فاحتمــل ذاك

راعـه ولـو ماشـفت انه يراعـيـــك *** عـساك تكسـر نيته عـن مـعـاداك





واحـذر عـدوك لو ظهر بي يصافيـك *** خـلك نبيه وراقـبه وين ماجــاك

لا تأمـنه واطلب من الله ينجـيـــــك *** ويـكـفـيك ربـك شـــر ذولا وذولاك





شفني انا يا بوك بآمرك وانهـيــك *** عـن التعرض بين الاثنين حـذراك

اذا حـضـرت اطـلابةٍ مـع شـرابيـك *** اسعى لهـم بالصلح واللاش يفداك





ابـذل لهم بالطـيب ربك يـنجـيـــك *** ولا تجضع الميزان مع ذا ولا ذاك

أما الشهاده فادّها إن دعوا فيـــــك *** بيِّن عـمود الدين لا عميَت اريـاك





بالك تـماشـي واحـدٍ لـك يرديـــك *** طالع بني جـنسك وفـكر بمـمشــاك

رابع أصـيلٍ فـي زمانـك يشاكـيــك *** لا شاف خمـلاتك عـن الناس غـطاك





وأحـذرك عـن طرد المقفي حذاريـك *** عليك بالمقبل وترك الي تعـــداك

ثـم العـن الشيطان لياه يغـويـــك *** ترى إن تبعـته للشـرابيــــك وداك





واوصـيك لاتشـكـي عـلينا بـلاويـك *** انت السبب طـرفك عيونك بيمنـاك

واعرف ترى اليا وطى الفهرواطيـك *** ولا انت أعـز من الجماعه هذولاك





المسك ياراسي عـن الذل واخطـيــك *** واحـذر تكـلم يا لساني حـــذراك

والف بجارك وقـم من دون عـانيـك *** وافطن لما يعنيك عن ربعـة أخواك





ياذيب وان جتك الغنم في مفاليـــك *** فاكمن الين ان الرعايا تعــــدّاك

مـن اولٍ ياذيـب تفـرس باياديـــك *** واليوم جاذيت عـن الفرس عـــدّاك





ياذيب عاهـدني واعاهـدك مـرميــك *** مرميك انا ياذيب لو زان مرمــاك

والنفس خالف رايها قـبل ترمـيــك *** ترى لها الشيطان يرمي بالاهــلاك





ومن بعـد ذا لا تصب النذل يعديــك *** وعن صحـبة الانذال حاشاك حاشاك

ترى العشير النذل يخلف طـواريــك *** وانا ارجي انك ماتجي دون أبــاك





والهقوة انك ماتجـي دون اهاليـــك *** ولاظـن عـود الورد يثمر بتنبـــاك

والحر مثلك يستحـي يصحـب الديـك *** وان صاحبه عاعا معاعات الاديـاك





لا تستمع قـول الطـرف يوم يلفيـك *** بالكذب يقضـي حاجـته كل ماجـاك

مـن نم لك نم بـك ولافـيه تشكيــــك *** وأيلاه قـد ازرا رفـيقــك وازراك





عـندك حكـى فينا وعندي حكى فيــك *** واصبحت كارهـنا وحـنا كرهـنـاك

مااخـطاك ماصابك ولو كان راميـك *** والي يصيبك لو تتقيت مااخـطــاك





مير استمع مني عـسى الله يهديـك *** النصـح يامالك لك الله لمــــولاك

عـندي مـظـنه ماتمـثلـتها فـيــــــك *** واطلب لك التوفيق من عند مــولاك

[ghada]

سلمت أناملك أخوي
كلمات رائعة ونصائح من أب لولده

هنا الشاعر يوضح لنا أنه من شكاوي العربان على ولدِه قام الأب يوصي أبنه بتقوى الله عسى الله يهدية ويدعي له بالتوفيق ويصلح حاله بالخير



أوصيك بالتقوى عـسى الله يهديك *** لـها وتـدركـها بتوفـيق مـــــولاك


الله بحـق اجـدادك الغـر يعطيـــك *** مـرضاته مـع ماتمـنـيته أمنـــــاك


أيضاً يوصية بالرجولة وأن يكون بالقرب منه ليساعده وأن لايبعد عنه ويطلب ليعطية رضاه ويطلب منه برجاء أن يكون رجل بمعنى الكلمة قول وفعل وليس كلام

اجعـل دروب المرجله مـن معانيك *** واحذر تميّل عـن درجها بمـرقاك


لاتنسـدح عـنها وتبغـيني أعـطيـك *** جمـيع ما يكفـيك ما حـصــل ذاك

أيضاً يطلب منه أنه ُيعاهده على الوفاء له والأمانه وما يرمية أي لايتركه لزمن لأن الشيطان أقوى منه وهو هلاك للأنسان

كلمات رائعة لما فيه من حكم ووصايا الأب لولدهِ
بارك الله فيك أخوي
على جمال ماأحضرت من درر الكلمات

[الشاعرحمد عبدالله العقيل]

كعادتك أختنا غاده تبادرين بردودك الثريه
وفعلا هذه القصيده من أروع ما قيل في نصح الأبناي

ولقد فاتني أن أعقب على أمر عقدي في القصيده
وهو قوله :
الله بحـق اجـدادك الغـر يعطيـــك *** مـرضاته مـع ماتمـنـيته أمنـــــاك
فقد قال فيها علماء العقيده كلاما ، مضمونه أنه لا يجوز التوسل إلى الله تبارك وتعالى بالأموات
وعودا على ذي بدء أشكرك مبادرتك وتحليلك الذي أضفى للموضوع ، وأبرز بعض نقاط جماله
أما هذه القصيدة العصماء ، فهي من عيون الشعر العربي ، وبالذات في الحقبة التي عاش فيها بركات الشريف ( رحمه لله )
والقصيدة على طولها إلا أنها تضمنت جوانب كبيره من العلاقات الخاصة والعامه ، فعلاقت المنصوح بربه ، وأمانته ، وأهله
فشكرا على الإضافه

حمد العقيل

[ghada]

الشكر موصول لك أخوي
على ذوقك العالي في أختيارك لمواضيعك النيرة القيمة
بمضمونها دائماً
بارك الله فيك وفي مداد قلمك النابض